KORONADAL CITY – Nagapadayon ang imbestigasyon sang mga otoridad sa pagkapatay sang isa ka most wanted person nga suno pa involbado sa bigtime carnapping syndicate sa Lambayong, Sultan Kudarat.
Ginkilala ni Police Major Jenahmeel Toñacao, hepe sang Lambayong PNP ang napatay nga si Abudi Sagabain Palakasi alias Abu Sagabain, 29-anyos, empleyado sang AMABI Banana Plantation kag residente sang Barangay New Cebu, Lambayong.
Suno kay Toñacao, nakit-an sang mga nagapatrol nga kapulisan ang suspek kag sang magaagi na kuntani sa checkpoint sang makita ang makaduluda nga hulag sini.
Apang sang ginpalapitan sang mga pulis, gilayon nga nagpalupok sang iya armas si Palakasi rason nga ginbalusan man ini sang mga otoridad.
Nag-angkon sang malubha nga igo sang bala ang suspek nga gintunaan sang iya kamatayon.
Narekober sang kapulisan kay Palakasi ang isa ka 45 nga armas, Honda XRM 125 motorcycle, kag isa ka sachet sang ginapatihan nga shabu.
Nahibaluan nga si Palakasi ang wanted sa two counts of murder kag involbado man sa dako nga sindikato sang robbery kag carnapping incidents sa probinsiya sang Sultan Kudarat.
