Luyag ni Sen. Imee Marcos nga usisaon ang ginaalegar nga money delivery scheme nga ginakaulamiran sang 18 ka anay mga military personnel nga mga tawo man ni anay Cong. Zaldy Co, kag ang na-report nga koordinasyon sang pila ka mga opisyal sang gobyerno sa International Criminal Court (ICC).
Gin-apelar ni Sen. Marcos sa mga anay marines nga nagbuyagyag sang alegasyon nga mag-atubang sa Senado agod mapanumpaan kag mangin opisyal ang ila mga pahayag.
Matandaan nga sa isa ka press conference, gin-ako sang mga anay military personnel nga nagserbe sila nga personal assistants kag security consultants ni Co kag kabahin sang ila trabaho ang pag-deliver sang mga maleta nga nagaunod sang kwarta.
Nalakip sa ginapahayag nga gindal-an nila sang kwarta sanday Co; anay House Speaker Martin Romualdez; anay Budget Secretary Amenah Pangandaman; anay Public Works Secretary Manny Bonoan; National Security Adviser Eduardo Año; kag mangin sa balay nanday Presidente Bongbong Marcos kag First Lady Liza Araneta-Marcos sa diin ginaalegar nga si Presidential Son kag Congressman Sandro Marcos ang nagbaton sang kwarta.
Samtang, nasaad man sa resolusyon ang paglantaw sa alegasyon sang mga anay militar nga sang December 2023 kag mga tuig 2024 kag 2025, ginmanduan sila para magsugat sa pila ka mga dumuluong nagikan sa International Criminal Court (ICC) kag ginsabat pa sang isa ka anay senador ang accommodation kag transportasyon sang mga ini.
Ginmensyonar man sa resolusyon nga si anay Sen. Sonny Trillanes ang in charge sa pag-abot sang amo nga mga dumuluong kag may ginpatigayon nga pagsinapol sa balay ni anay Justice Secretary kag karon Ombudsman Jesus Crispin Remulla kaupod sanday Trillanes kag si PGen. Nicolas Torre III.
