Patay ang isa ka miyembro sang Dawlah Islamiya- Hassan Group batok sa tropa sang militar sa Maguindanao del Sur. Ginkilala sang mga otoridad ang napatay nga si Mermo Mling nga miyembro sang nasambit nga grupo.
Narekober sang tropa sang militar ang mga gamit nga ginakalakipan sang M14, M79, SMG Cal .45, duha ka Improvised Explosive Device (IED), mga magasin, unit sang Baofeng Radio, duha ka keypad cellphone kag iban pa nga mga personal nga gamit sang mga kalaban.
Ginpahayag naman ni Brigadier General Oriel Pangcog, Brigade Commander sang 601st Brigade nga nag-umpisa ang engkwentro sa tunga sang militar gikan sa 40 Infantry Brigade kag iban pa nga mga operating units sa idalom sang Joint Task Force Central sa Sitio Mayan, Brgy Labu labu II, Datu Hoffer, Maguindanao del Sur.
Sandig sa report ang mga terorista nga grupo ang ginapamunuan ni Nasser Guinaed.
Gindayaw naman ni Major General Alex S. Rillera, Commander sang 6th Infantry (Kampilan) Division kag Joint Task Force Central ang tropa sang 40IB kag mga operating units sang JTFC sa pakigbato sa mga terorista nga grupo.
