Hinimok ni Romeo S. Brawner Jr. ang hanay ng Armed Forces of the Philippines na palawakin ang kanilang papel lampas sa tradisyonal na tungkuling pandigma at ituon din sa nation-building ang kanilang misyon.
Sa kanyang talumpati sa flag-raising ceremony sa Camp Aguinaldo nitong Lunes, Marso 30, binigyang-diin ng AFP chief na mahalagang maiugnay ang sakripisyo ng mga sundalo sa pagbuo ng isang lipunang may dignidad at kaayusan para sa lahat ng Pilipino.
Ayon kay Brawner, nagkakaroon lamang ng tunay na saysay ang sakripisyo ng isang kawal kung ito ay nagbubunga ng kapayapaan at mas maayos na pamumuhay para sa mamamayan.
Iniuugnay rin niya ang panawagan sa diwa ng Semana Santa, na aniya’y isang mahalagang panahon para sa pagninilay at pagpapatibay ng mas malalim na layunin ng serbisyo publiko.
Dagdag pa niya, ang tungkulin ng militar ay hindi lamang nakatuon sa seguridad kundi nakapaloob din sa mas malawak na pundasyon ng lipunan, kaya’t hinikayat niya ang mga tropa na isabuhay ang mas makabuluhang anyo ng paglilingkod sa bayan.
