KORONADAL CITY – Ginahaya na sa subong ang bangkay sang isa ka mister nga naghikog makaligad nga ginhana nga patyon ang misis sini nga bag-o lamang nagpauli gikan sa iban nga pungsod sa sa Sitio, Green Hills, Awang, Datu Odin Sinsuat, Maguindanao
Suno kay Police Chief Inspector Achmad Alibonga, chief of police sang Datu Odin Sinsuat , ginhana nga patyon paagi sa pagpanglabo ni Landy Gunsi Paulino, 31 anyos, is aka mangunguma ang iya asawa nga si Leni Lamgan Takpan nga isa ka OFW nga duha ka adlaw pa lamang nga nakapauli gikan sa abroad.
Naguwa sa imbestigasyon sang kapulisan nga nagbais ang mag-asawa matapos nga ginsukot sang biktima ang mister sini kun sa diin nagpadulong ang kwarta niya nga ginapadala sa pagpatukod sang puluy-an.
Apang, hinali na lamang nga nagbunot sang binangon si Paulino kag ginlabo ang iya asawa sa mismo nga puluy-an sang mga ginikanan sang biktima.
Gintilawan pa ini nga punggan sang amay sang biktima nga si Alberto Lamgan Takpan kag utod nga parehonga nalamita kag napilasa sa pagpanglabo.
Maayo na lamang kag nadala pa sa hospital ang mga pilason kun diin nagapaayo na si Leni apang nautod ang natuo nga kamot sini.
Matapos himuon ang krimen, gilayon nga naghikog si Paulino gamit ang nylon nga ginhigot sini sa sanga sang puno sang mangga sa likod sang ila nga puluy-an.
