KORONADAL CITY – Nagapadayon ang imbestigasyon sang mga otoridad sa nagluntad nga pagpatay sang isa ka Mister sa kaugalingon nga asawa kag duha ka menor de edad nga bata sini antes nga naghikog sa banwa sang Tupi, South Cotabato.
Ginkilala ni Police Major Rafael Banggay Jr, hepe sang Tupi PNP ang mga napatay nga biktima nga sanday Beverlyn Dinal ,27-anyos, mga bata sini nga sanday alias Shelton kag alias Peter nga lunsay mga menor de edad nga residente sang Sitio Glandang, Barangay Kablon, Tupi, South Cotabato samtang ang suspek nga naghikog matapos himuon ang krimen ang ginkilala nga si Allan Dinal ,37 anyos nga isa ka mangunguma.
Suno kay Banggay, naguwa sa imbestigasyon sang mga otoridad nga nagluntad ang insidente alas-9:35 kagab-i sa nabukid nga bahin sang lugar kun diin nabatian pa sang mga kaingod sang mga biktima nga nag-inaway ang mag-asawa samtang nagahiboi ang duha ka mga kabataan sini.
Pagkaligad sang tunga sa oras naghipos na ang mga ini kag sang gin-chekyar sang utod sini nakita na lamang nga duguon na kag wala na sang kabuhi ang mga biktima.
Mangin ang suspek ang nagauyat pa sang batangas (folded knife) nga gingamit sini sa pagbuno sa iya asawa kag mga bata kag amo man ang gin-usar sa paghikog-patay sini.
Nag-angkon naman sang mga pilas sa nagkalain-lain nga bahin sang iya lawas ang mga biktima samtang gindala pa sa hospital ang suspek apang gindeklarar na nga dead on arrival.
Tuman nga selos naman ang nakita nga rason sang mga otoridad sa nasambit nga insidente bangud sa nagatratabo ang asawa sang suspek kag pila ka adlaw na nga wala nakapuli.
Narekober naman sa Crime Scene ang 2 ka folded knife nga gingamit sang suspek sa pagpatay sa pamilya sini.
