TUPI, SOUTH COTABATO – Nagapadayon sa karon ang imbestigasyon sang mga otoridad matapos nga masapwan nga duguon sa plantasyon sang pinya sa Tupi, South Cotabato ang missing nga OIC manager sang Kabus Padatuon (KAPA) Community Ministry International Inc sa Alabel, Saranggani Province.
Ginkilala ang biktima nga si Remely Jombitado Iral, 42 anyos nga residente sang siyudad sang General Santos.
Suno kay Jay Malida, guwardiya sang Tupi Municipal Hospital, duguon kag madamo sang buno sa nagkalain-lain nga bahin sang iya nga lawas si Iral sang gindala sa balay-bululngan kaina sang aga.
Nakita suno pa ang biktima sang mga residente sang Barangay Kablon nga wala sang animo sa plantasyon sang mga pinya sa nasambit nga banwa.
Bangud sa madamo nga pila nga naangkon sini gin-refer si Iral sa South Cotabato Provincial Hospital apang ginsaylo man sang iya mga himata sa isa ka pribado nga hospital.
Hugot nga seguridad sa karon ang ginapatigayon sa biktima matapos nga mareport nga mga armado nga kalalakihan ang nagkidnap sa iya.
Madumduman nga nadula si Iral sang Enero 23 kadungan sang pagluthang-patay sang riding in tandem sa driver sini nga si Bresnev Morada sa siyudad sang General Santos.
