TBOLI, SOUTH COTABATO – Binawian ng buhay ang isang Misis matapos pagtatagain ng kanyang sariling mister, bago rin sinaksak ang sarili sa Sitio Blue, Barangay Salacafe, bayan ng T’boli, South Cotabato.
Kinilala ang biktima na si alyas Dina, habang ang suspek ay nakilalang si alyas Telek, 46 anyos na parehong residente ng nabanggit na lugar.
Sa panayam ng Bombo Radyo Koronadal kay Police Lieutenant Gilda Forro, Deputy Chief of Police ng T’boli Municipal Police Station, inihayag nito na naghahanda umano ng agahan si Dina nang dumating ang kanyang mister na armado ng lagaraw o karit at bigla na lamang pinagtataga ang biktima.
Tinamaan ang ginang sa iba’t ibang bahagi ng katawan na agad nitong ikinasawi. Matapos ang krimen, tumakas ang suspek ngunit makalipas ang ilang oras ay umuwi rin sa kanilang tahanan.
Nang mamalayan umano ng mister na wala na ang kanyang asawa, sinaksak nito ang sarili na nagresulta rin sa kanyang pagkamatay. Batay sa inisyal na imbestigasyon, napag-alaman na si Telek ay matagal nang dumaranas ng depresyon simula pa noong 2023.
Sa ngayon, naulila ng mag-asawa ang kanilang anim na mga anak.
