KORONADAL CITY- Gina-obserbaran sa gihapon sa karun ang kahimtangan sang isa ka misis makaligad ini nga ginhana nga luguson sang abyan sang iya nga mister sa Prk. Paglaum, Brgy. Liberty, Tampakan, South Cotabato.
Sa ekslusibo nga interbyu sang Bombo Radyo Koronadal kay Diana Menio, bayaw sang biktima nga si Gina, naghagadanay suno pa ang mister sang biktima kag ang mga abyan sini nga mag inom ka mag videoke kun sa diin nabilin na lamang sa puluy-an si alyas Gina kag ang duha ka mga kabataan sini.
Dugang pa sini nga samtang naga-inom ang mag-abyanay, naglisensya suno pa ang suspek nga ginkilala lamang sa pangalan nga Toto nga magapauli na suno pa ini apang nagdiretso lamang ini sa puluy-an sang biktima kag didto ginhana nga luguson si alyas Gina apang nagbato ini kag bangud napaslawan ini sa iya nga plano nga luguson ang biktima ginlampusan niya ini sang bato sa nawong.
Pagpauli sang mister sang biktima sa ila nga puluy-an, natingala ini kun nga-a patay tanan nga suga kag gintawag ang misis apang nasapwan na lamang sini nga nagahamyangon, nagahubag ang nawong kag napuno sang dugo ang iya nga misis.
Gilayon naman nga gindangat sa balay bululngan si alyas Gina kun sa diin yara sa kritikal nga kondisyon sa gihapon ini sa karun samtang ang suspek ang yara naman sa kustodiya sang Tampakan PNP kag nakatalana nga pasakaan sang kaso.
