KORONADAL CITY – Nagapadayon ang damage assessment sa pagkaguba sang mga panimalay sa mga Sitio nga nangin apektado sang landslide sa banwa sang Bagumbayan, Sultan Kudarat.
Ini ang ginpahayag ni Richie Salazar, MDRRMO 3 sang Bagumbayan, Sultan Kudarat sa interview sang Bombo Radyo Koronadal.
Suno kay Salazar, ginpadulungan nila ang landslide area subong nga adlaw kaupod ang Mines and Geosciences Bureau (MGB) agud nga ma-asess kun mahimo pa nga balikan sang mga nagbakwit nga 13 ka pamilya ang ila mga panimalay.
Hibaluon man kun safe pa nga magtukod sang balay sa mga Siito nga apektado nga ginalakipan sang Sitio Kawayan, Sitio Blakol, Sitio Falls kag Sitio Kipuso.
Madumduman nga ang 13 ka mga pamilya ang nagbakwit matapos nga naguba ang ila mga panimalay tuga sang dalagko nga mga tension cracks dulot sang amat-amat nga pagka-usmod sang duta.
Sa tion nga indi na safe nga magbalik sa ila mga panimalay ang mga residente, magabulig ang MDRRMO sa pagpangita sang luwas nga lugar nga nagakadapat e-relocate ang mga ini.
Nahibaluan nga naghatag na sang inisyal nga bulig ang local government unit sang Bagumbayan sa mga apektado nga pamilya kasubong sang food packs kay hygiene kits.
Kaangot sini, nagapanawagan naman ang opisyal sa mga taga-Bagumbayan nga mag-ulu-aligmat kag mangin alerto sa tion nga magbuhos ang mabaskog nga ulan.
