KORONADAL CITY – Naluwas sang rescue team ang isa ka minero sa natiphag nga tunnel sa banwa sang Tboli, South Cotabaro matapos ang 34 ka oras.
Ini ang ginkumpirmar ni Provincial Disaster Risk Reduction and Management Officer Mila Lorca sa interbyu sang Bombo Radyo Koronadal.
Suno kay Lorca, naluwas ang minero nga si Jaime Valdez, 33 anyos nga residente sang Barangay Kematu sa nasambit nga banwa.
Napaguwa nga buhi sa natiphag nga tunnel sang mga rescuer si Valdez rason nga nagapasalamat ini.
Naguwa naman sa inisyal nga imbestigasyon sang T’boli PNP nga si Valdez kag duha pa ka mga kaupdanan ang nagsulod sa tunnel nga ginapanag-iyahan ni Jojo Casensa nga yara lamang sa ibabaw sang isa pa ka tunnel sang Tribal Mining Corporation ukon TMC.
Samtang yara sa sulod natiphag suno pa ang upper portion sang TMC tunnel nga nangin tunaan sang pagkahulog sang tatlo ka minero sa ibabaw sini.
Maswerte naman nga nakadalagan paguwa ang duha ka minero samtang na-trap si Valdez.
Matapos ang insidente nagpatawag gilayon sang pagsinapol ang Provincial Mining Regulatory Board ukon PMRB sang South Cotabato kun diin gin-istoryahan ang pagpasaka sang kaso sa mga kontraktor sang small scale mining sa lugar kag pagpatuman sang stoppage order sa mga minahan nga malapit sa natiphag nga tunnel.
