KORONADAL CITY- Ginbalikan sang 33rd Infantry Makabayan Battalion ang mga myembro sang tribo nga Manobo sa Brgy. Ned Lake Sebu South Cotabato agud hibaluon ang kahimtangan sang mga bakwit makaligad mag-ibwal ang kinagamo sa tunga sang Militar kag sang New People’s Army pila ka semana na ang nakaligad.
Nahibaluan nga nagapabilin sa gihapon sa Tulale village ang masobra 100 ka indibidwal nga nag evacuate bangud sa kinagamo sa Sitio Datal Bonglangon.
Kadungan sang selebrasyon sang kapaskwahan, ginbalikan sang militar ang mga bakwit nga ginakabug-usan sang mga himata man sang napatay nga tribal leader nga ginasiling nga nagsulod sa NPA nga si Datu Victor Danyan kag iban pa nga mga kaupdanan sini agud mahatagan sang bulig kasubong sang pagkaon, bayo kag mga tsinelas para sa mga bata.
Malipayon naman sang mga ini nga ginbaton ang mga regalo sang mga suldado.
Ang nasambit nga tikang sang militar ang pagpapakita suno pa sang kabalaka sa tribo sa pihak sang nagluntad nga kinagamo nga ginakaulamiran sang ila tribal leader.
