KORONADAL CITY- Nagpangduha-duha si South Cotabato Governor Daisy P. Avance Fuentes sa sinseridad sang New People’s Army (NPA) sa liwat nga pagbalik sa negotiationg table.
Ini makaligad nga may natabo nga panibag-o nga asod-asod nga engkwentro sa tunga sang 27th Infantry Batallion Philippine Army kag ginapatihan nga grupo sang NPA sa mga banwa sang Tampakan kag Lake Sebu, South Cotabato.
Sa interbyu sang Bombo Radyo Koronadal kay Governor Fuentes, dapat nga una nga matalakay ang liwat nga pagdeklarar sang ceasefire sang duha ka grupo agud nga wala sang matabo pa nga engkwentro samtang nagaistoryahanay ang duha ka bahin.
Apang, aminado si Fuentes nga ginalauman na sini ang engkwentro bangud nagapadayon ang operasyon sang AFP.
Nahibaluan nga nagdugay sang 5 ka minutos ang nilupkanay sa tunga sang mga suldado nga katapu sang 27th IB kag Guerilla front 73 sang NPA sa Sitio Colombong, Brgy. Lamfugon, Lake Sebu nga ginsundan naman sang kambyuhanay sang lupok sa tunga sang mga suldado kag Guerilla Front 72 sa Sitio Lahak, Danlag, Tampakan.
Maayo na lamang kag wala sang casualties nga napagkit sa duha ka bahin.
Dugang pa sang opisyal, madugay na nila nga ginamonitor ang on-going recruitment sang NPA kag extortion activities sa probinsiya.
