KORONADAL CITY- Ginkalipay sang militar ang pagsungka sang Spokesperson sang New People’s Army National Democratic Front Far South Mindanao Region nga si Ka Efren Aksasato o Noel Legaspi sa tuod nga pangalan kag asawa sini nga Medic sang rebelde nga grupo nga si Ka Wendy.
Sa interbyu sang Bombo Radyo Koronadal kay 27th IB Battalion commander Lt. Col. Benjamin Leander, dako ang mabulig sang pagsungka sang mag-asawa agud nga magantyat ang iban pa nga mga rebelde sa probinsya sang South Cotabato nga magbalik sa gobyerno.
Kadungan sang pagsungka sang mga rebelde, ginpasiguro naman sang mga ini nga paga-atubangon nila ang mga kaso nga ginsang-at batuk sa ila apang prayoridad sa gihapon sang militar nga mahatag ang mga benepisyo nga ginpromisa sa ila sang Duterte administration.
Suno naman kay South Cotabato Governor Daisy Avance-Fuentes nga nangin tulay man sa pagsungka sang mag-asawa nga rebelde, si Ka Efren ang 26 ka tuig nga nagapakigbato para komunista kag rebelde nga grupo apang nahuna-hunaan sini nga magsungka agud ihatag sa iya pamilya ang nabilin pa nga tuig sang iya kabuhi.
Dako naman nga kawad-an sa operasyon sang NPA sa rehiyon ang pagsurrender sang mga matag-as nga lider sang komunista kag rebelde nga grupo.
