KORONADAL CITY – Ginpasalamatan sang pamunuan sang 33rd Infantry Batallion Philippine Army ang Moro Islamic Liberation Front (MILF) sa pagkaarestar sang 5 ka notoryos nga katapu sang Bangsamoro Islamic Freedom Fighters (BIFF) kag ISIS inspired nga mga terorista sa probinsiya sang Maguindanao.
Sa interbyu sang Bombo Radyo Koronadal kay Lt. Col. Harold Cabunoc, commanding officer sang 33rd IB Philippine Army, dako ang bulig sang koordinasyon sang MILF kag mga sibilyan agud nga madakpan ang mga BIFF sa Brgy. Mangadeg, Datu Paglas, Maguindanao.
Suno kay Lt. Col. Cabunoc, dako man ang nabulig sang mga impormasyon nga ginhatag sang mga ini sa militar agud nga mapunggan ang pagpatigayon sang kalakasan sang rebelde nga grupo.
Suno pa sa iya ang grupo ni BIFF kumander Sulayman Tudon ang involbado man sa pagduso sang droga, pagbaligya sang mga armas, pagpanalakay kag pagpamomba agud kilalahon sang ISIS kasubong sang mga Maute.
Dako man ang pagpati ni Cabunoc nga may dako nga grupo kag gamhanan nga opisyal nga nagapundo sa mga ini bangud sa mabaskog nga armas nga ila ginagamit pakig-away sa mga suldado.
Madumduman nga nagdugay sang masobra isa ka oras ang engkwentro sa tunga sang military kag BIFF kaina sang aga nga nagresulta sa kamatayon sang 2 BIFF kag pagkaarestar naman sang 5 sa mga ini.
Narekober naman ang mga matag-as nga kalibre sang armas kag mga eksplosibo sa ginapatihan kuta sang mga terorista.
