KORONADAL CITY – Ginahulat na subong nga adlaw sang MILF kag Bangsamoro Transition Commission ang pagpirma ni Pangulong Rodrigo Duterte sa Bangsamoro Organic Law agud tigayon nga mangin layi na.
Sa eksklusibo nga interbyu sang Bombo Radyo Koronadal kay Bangsamoro Transition Commission chairman Ghadzali Jaafar, ginpahayag sini nga dako ang pagsalig nila kay Pangulong Duterte nga indi sila pag-paslawon sa 48 hours promise sini.
Suno kay Jaafar matapos nga mapirmahan ang BOL, magapreparar na ang Comelec sa sulod sang 90-250 days para sa plebisito nga igapatigayon sa mga probinsiya sang Tawi-tawi, Basilan, Maguindanao, Isabela City, Cotabato City, 6 ka banwa sa Lanao del Norte kag 39 ka barangay sa North Cotabato nga mangin expansion area sang Bangsamoro Autonomous Region.
Matapos sini, nakahanda naman ang magapungko nga mga opisyal sa pagadihunon nga provisional government nga pagatawgon nga Bangsamoro Transition Authority nga pagapamunuan sang Bangsamoro parliament nga may 80 ka myembro.
Sa 80 ka katapu sang Bangsamoro parliament, 41 diri ang igarekomendar sang MILF samtang ang 39 naman ang magagikan sa nagkalain-lain nga probinsiya nga pigapilion sang pangulo sang pungsod.
Samtang, ang pinakauna nga eleksiyon anng igapatigayon naman pag-abot sang 2022.
