KORONADAL CITY- Yara na sa kustodiya sang mga otoridad ang isa ka Kumander sang Moro Islamic Liberation Front (MILF) kag upod sini makaligad nga maarestar sang mga otoridad sa Barangay Tunggol, Datu Montawal, Maguindanao.
Ginkilala ni Police Chief Inspector Erwin Tabora, hepe sang Datu Montawal PNP ang naarestar nga sanday Hamsa Abdullah Pandita alyas Kumander Transceiver kag Ehsan Eli.
Suno kay Tabora, namutikan si Pandita sa isa ka okasyon sa nasambit nga lugar rason nga ginserbi sang mga ini ang warrant of arrest batuk sa suspek sa kaso nga double murder kag arson.
Samtang si Eli naman ang main suspek sa pagpatay sa mga biktima nga sanday Engr. Joseph Adam, nga naappoint sa Mallitubog Maridagao Irrigation Project (Malmar) sa Pikit, North Cotabato kag Mustapha Abdullah Andoy nga isa man ka engineer sa nasamit nga banwa.
Sa karon, ginahular nalang ang commitment order batuk sa mga suspek agud nga mabalhin sa BJMP ukon sa Provincial jail.
Nahibaluan nga naka-angkon pa sang tensyon sa sulod sang Municipal Police Station bangud may pila ka mga kaupdanan sini nga MILF kag pulitiko nga luyag kwaon ang mga suspek.
