Nagdangop ang aktres kag beauty queen nga si Michelle Dee sa National Bureau of Investigation (NBI) agud magpasaka sang panumbungon nga cyber libel batok sa online influencer nga si Xian Gaza.
Suno kay Michelle, nagpalapta si Xian sang “misleading” nga mga impormasyon nga naga-involve sang iya pangalan.
Ginlakip man ang tatlo ka iban pa nga Facebook pages sa iya nga complaint. Isa sa sini nga pages ang nag-alegar nga nagpalagyo na si Michelle sa iban nga pungsod.
Suno sa abogado ni Michelle nga si Atty. Maggie Abraham-Garduque, lunsay fake news ini nga “defamatory accusations.”
Ginpahayag man sang aktres nga bisan isa siya ka public figure, indi ini mahimo gamiton nga excuse agud nga gub-on ang iya pangalan paagi sa fake news.
Nagsabat naman si Xian paagi sa isa ka online post nga “strategic” ang pag-file ni Michelle sang kaso kag mahimo nga makaagaw sang atensyon sang publiko halin sa matuod nga gid nga kaso sini.
Nahibaluan nga antes sini, na-involve sa kontrobersiya si Michelle kag ang iya mga abyan nga sanday Rhian Ramos kag Samantha Panlilio matapos gin-akusaran sila sang driver ni Rhian nga pagpang-torture nga ginaalegar natabo mismo sa condo ni Michelle sang Enero.
Lunsay nanginwala ang tatlo sa amo nga akusasyon.
