KORONADAL CITY- Nagpabutyag sang iya nga suporta si Maguindanao Govenor Esmael “Toto” Mangudadatu sa ginaduso ni Pres. Rodrigo Duterte nga Martial Law Extension sa isla sang Mindanao kaangot sa gihapon sa nagapadayon nga Marawi Crisis kag mga kinagamo sa pila ka bahin sang rehiyon.
Sa interbyu sang Bombo Radyo Koronadal sa Gobernador, bilang taga Mindanao nakit-an sini kag sang iya mga constituents ang kinalain sang sitwasyon sang wala pa ginpaidalom ang Mindanao sa Martial Law kun sa diin sa ila probinsya, napahagan-hagan na suno pa ang pinatyanay nga ginahimo sang mga rebelde kag sang iban pa nga lawless elements butang naman nga ginapasalamat sang presidente.
Samtang kaangot sa gihapon sa nagapadayon nga gyera sa Marawi, indi malikawan nga pila sa mga terorista ang nakagwa na sa war zone kag indi imposible nga makalab-ot man sa probinsya sang Maguindanao rason nga pahayag sini nga kun pagatugutan sang presidente, paga armasan sini ang mga sibilyan kag sila mismo ang magapakig gyera sa mga terorista.
