KORONADAL CITY – Tigayon na nga ginkasuhan ang mga suspek nga nagluthang sa bodyguard ni Tupi Mayor Reynaldo Tamayo Jr.
Sa impormasyon nga nakuha sang Bombo Radyo Koronadal, ginkilala ang nasambit nga mga suspek nga sanday Rakiben Talib Camsa kag isa ka John Doe kun sa diin ginpasakaan ang mga ini sang kaso nga frustrated murder sa Office of the Provincial Prosecutor diri sa siyudad sang Koronadal bangud sa pagluthang kay Zandro Lorenzo sa bahin sang Sitio Lote, Brgy Palian, sa nasambit nga banwa.
Kun madumdoman, nagluntad ang pagpangluthang sadtong Agosto 12 kun sa diin pakadto si Lorenzo sa puloy-an sang alkalde kaupod ang iya bata sang ginluthang ini sang tatlo ka beses kag naigo sa iya dughan kag kamot.
Sa subong padayon pa nga ginapangita ang mga suspek upang mapanabat ang mga ini sa ila ginakaatubang nga kaso.
