KORONADAL CITY- Nag apela sang bulig ang pamunuan sang Moro Islamic Liberation Front (MILF), Coordinating Committee on the Cessation of Hostilities (CCCH) kag Armed Forces of the Philippines (AFP) ang mga residente sang Barangay Molon, Palimbang, Sultan Kudarat bangod sa padayon nga pagpangharas kag pagpanghadlok sang private armed group.
Sa ekslusibo nga interbyu sang Bombo Radyo Koronadal kay Barangay Chairman Salik Adam, ginahayag sini nga ang grupo ni ex-barangay chairman Kalid Kalaing ang ang ginatumod sang mga ini nga nagapanggamo sa ila nga barangay.
Ginpa-athag man ni Adam nga indi rido ang nagluntad sa ila nga barangay kundi pagpanghadlok kag pagpangharas ni Kalaing kag sang mga kaupdanan sini.
Ang grupo suno pa ni Kalaing kaupod ang kapin 20 armado nga kalalakihan ang nagpatay sa 15-anyos nga estudyante nga ginkilala kay Mojahid Sanggayen ila nga ginbantayan Sitio Kumilat, Barangay Ned, Lake Sebu, South Cotabato sang Abril 26.
Ginsundan man ini sa pagpangluthang sa mga sibilyan nga padulong sa moske, pagpangawat sang mga hinuptan nga sapat kag kagamitan snag mga residente kag ang pagguba sa mga puluy-an nga ila nga ginkawatan.
Magluwas diri, sila man suno pa ang responsable sa pag-atake sa CAGFU detachment sa nasambit nga lugar.
Nahibaluan nga may pending warrant of arrest si Kalaing kaupod ang mga himata sini bangod sa kaso nga robbery.
