KORONADAL CITY – Trauma kag kakulba ang naeksperiensiyahan sang mga residente nga nakapalibot sa naglupok nga bulkang Kanlaon, Lunes sang gab-i, Hunyo 3,2024.
Ini ang ginpakigbahin ni Ms. Thina Samson Merual, residente sang La Castellana, Kanlaon sa eksklusibo nga interview sang Bombo Radyo Koronadal.
Suno kay Merual, nagapasalamat siya kag ang iya pamilya nga medyo malayo sila sa tiilan sang bulkan bangud wala sila nagbakwit sa baylo nagpabilin sila sa ila puluy-an.
Apang, suno sa iya nakalab-ot sa ila ang madamo nga abo kag asupre nga tuman ka baho gikan sa bulkang kanlaon.
Nagapasalamat man gani ini nga pagkatapos sang paglupok sang bulkan kagab-i nagbuhos man ang mabaskog nga ulan rason nga nahagan-hagan ang baho nga ila nahaklo.
Bangud gani sa paglupok sang bulkan, nagakaubos na ang baligya sang face mask bangud ini ang ginagamit sang mga residente kay delikado ang paghaklo sang asupre ilabi na sa mga may balatian na nga Asthma.
Ginatos ka mga pamilya naman ang nagatiner subong sa mga evacuation centers ilabi na yadtong ang ila panimalay sakop sang danger zones.
Gilayon naman nga nagpanagtag sang bulig ang mga opisyal sa mga apektado nga residente ilabi na ang pagkaon kag face mask.
Sa karon, nagapangamuyo na lamang ang mga residente nga indi na maglala pa ang pagsigabong sang bulkan agud indi mabutang sa ital-ital ang kabuhi sang mga ini.
