KORONADAL CITY – Naghingyo sang bulig ang masobra 20 ka pamilya sa isa ka barangay sa banwa sang Matalam, North Cotabato makaligad nga makaeksperiensiya sang pagbaha ang ila nga lugar tuga sang mabaskog nga pagbubo sang ulan.
Suno sa MSWDO-Matalam, apektado sang pagbaha ang Purok Yellow Bell kag kaiping nga purok sa Barangay Poblacion makaligad ang mabaskog nga pagbubo sang ulan.
Sa subong, mabudlay para sa mga residente sa pagtabok agud nga makabakal sang pagkaon sa guwa sang ila puluy-an bangud sa suno pa na-trap sila sa kadalumon sang baha.
Apang, gilayon naman nga nagresponder ang mga opisyal sa nasambit nga lugar agud nga mabuligan ang mga ini.
Ginpasiguro man sang LGU-Matalam nga pagahatagan sang gilayon nga bulig ang mga apektado nga pamilya.
