KORONADAL CITY-Tuman nga kabado subong ang mga residente sa Clear Water, Florida, USA bangud ini ang lugar nga madason nga pagalaslason ni Hurricane Irma nga subong batyag na ang mabaskog nga ulan kag hangin.
Sa interbyu sang Bombo Radyo Koronadal kay Marilyn Gumbao Carreon, duha ka tuig na nga nurse sa lugar nga taga San Roque, Koronadal City, ginpahayag sini nga hadlok sila ilabi na bangud alas dos karun sa hapon sa Pilipinas okun alas dos sang kaagahon sa Amerika ginalauman nga mag igo sa Clear Water ang bagyo apang pangamuyo na lamang ang ila ginahimo agud nga makaluwas sa nagahilapit nga kalamidad.
Kaangot sini , nag abiso na suno pa ang Florida State Government nga makaangkon anay sang temporaryo nga curfew halin alas 5 sang hapon sa Amerika kag hugot nga ginadilian ang mga tawo nga nagalapta pa sa dalan.
Ini agud nga masiguro ang kaluwasan sang tanan kag masiguro nga yara sa mga evacuation centers na ang mga ini.
