KORONADAL CITY- Preparado na ang pamunuan sang 37 Infantry Battalion, 6 Infantry Division, Philippine Army sa paghatag sini sang serbisyo sa bilog nga katawhan nga nasakupan sang mga ini sa preparasyon man sang palaabuton nga Barangay kag Sangguniang Kabataan Elections 2023.
Ini ang nangin pahayag ni Lt. Col. John Paul Baldomar, Commander sang 37 Infantry Battalion, 6 Infantry Division, Philippine Army sa interview sang Bombo Radyo Koronadal.
Suno sa iya, preparado na ang mga ini sa mga igamando sang gobyerno national kag pag deploy sang mga tropa sini sa mga lugar nga sakop sang ila nga pamunuan.
Dugang pa ni Baldomar, malipayon kag willing ang mga kasuldaduhan nga magdeploy sang ila nga presensiya sa nagkalain-lain nga lugar agud nga ipasiguro ang peaceful kag orderly nga election sa ila nga lugar.
Magluwas diri, ginpasiguro man sang opisyal nga on top of the situation sa gihapon ang kasuldaduhan sa tanan nga panghilitabo may kaangtanan sa pagpabilin sang kalinong kag katawhayan sa bilog nga probinsiya sang Sultan Kudarat.
