Mga OFW sa Israel gin alerto bangud sa posible nga pag-ibwal sang giyera sa tunga sang Palestine kag Israel

KORONADAL CITY- Nakabatyag subong nga kahadlok ang nilibo ka mga Overseas Filipino Workers sa Israel makaligad ang naga-init nga tensyon sa tunga sang nasambit nga pungsod kag sang Palestine.

Suno kay Bombo International Correspondent Elvie Selario Aviador, isa ka OFW sa Tel Aviv nga naghalin sa syudad sang Koronadal, nakaalerto ang bug-os nga Israle kasunod sang kamatayon sang top islamic Jihad commander nga si Bahaa Abu al-Ata mangin man ang asawa sini sa ginpatigayon nga air raid sang pungsod sa Gaza strip makaligad ginmando ni Prime Minister Benjamin Netanyahu ang operasyon batuk kay Abu al-Ata nga ginatudlo nga yara sa likod sang rocket, drone kag sniper attacks sa Israel kag ang hana nga pag sulod sini sa nasambit nga pungsod.

Kasunod sang kamatayon sang Jihad commander nagbalos man ang Hamas, nga amo ang Palestinian organisation nga nagapamuno sa Gaza Strip kun sa diin naglunsar man sila sang rocket attack sa Southern kag Central Israel kun sa diin target ang commercial capital sini nga Tel Aviv.

Napilasan man ang 40 ka indibidwal makaligad maigo ang projectile sa isa ka puluy-an kag sa highway mangin man sa isa ka factory nga nagtuga sang sunog.

Sa subong ginkanselar ang mga klase samtang ginsarado man ang mga dalan sa tunga sang Israel kag Gaza bangud sa nagalala nga tensyon.