Nagdangat sa 10 ang patay kag 35 ang pilason matapos gin-arado sang isa ka truck ang mga nagaselebrar nga tawo sang Bag-ong Tuig sa New Orleans sa Louisiana, USA.
Nalakip ang suspek sa mga napatay matapos nagbato ini sa mga kapulisan.
Ang driver sang truck ginkilala sang Federal Bureau of Investigation nga si Shamsud-Din Jabbar, 42, residente sang Texas, kag ginaalegar nga nakaserbe anay sa military sang USA.
Natabo ang insidente sa popular nga French Quarter nga masami ginakadtuan sang mga tawo kun magsug-alaw sang New Year.
Suno sa imbestigasyon, ginhungod suno pa sang suspek nga mangsalakay sang mga tawo kag gintinguhaan gid sini nga madamo ang iya maigo.
Ginakabig man sang otoridad nga isa ini ka akto sang terorismo.
May nakit-an man nga potential explosive devices sa area kag may flag man sang Islamic State of Iraq and Syria (ISIS) sa salakyan sang suspek sang ginhimo sini ang krimen.
Gina-imbestigaran na subong sang otoridad kun ano ang koneksyon sini sa amo nga terorista nga grupo.
Natabo ini nga pagpang-atake sa French Quarter inoras lamang antes ang pag-host sang New Orleans sang The Sugar Bowl nga isa ka tuigan nga college football game nga ginabisita sang fans halin sa nagkalain-lain nga parte sang US.
Matandaan nga may kaangay man nga pagpang-arado sang salakyan nga natabo sa Germany sang Paskwa kun sa diin lima ang patay kag masobra 200 ang pilason kun sa diin isa ka tawo sa Saudi Arabia ang gintudlo nga suspek.
