KORONADAL CITY- Madinalag-on ang ginpatigayon nga implimentasyon sang 6 ka search warrants sang gintingob nga pwersa sang PDEA kag PNP batuk sa notoryus nga Bawan Drug Group sa Pikit, North Cotabato.
Sa nasambit nga operasyon sa pagpanguna ni PDEA 12 Director Valente G. Cariño kaupod ang Pikit Municipal Police Station, Cotabato Police Provincial Office (CPPO), CPPO-Provincial Intelligence Branch, Cotabato Police Mobile Force Company, Regional Public Safety Company, Municipal Police Stations sang Matalam, Carmen, Kabacan, M’lang kag Tulunan, madinalag-on nga ginpatigayon ang operasyon sa bisinidad sang Brgy. Batulawan, Pikit, North Cotabato nga nagresulta sa pagka-arestar ni JOHAINA LABARIOS Y AYUNAN, yara sa legal nga edad, may asawa, wala sang trabaho kag residente sang nasambit nga lugar kun sa diin nakumpiskar sa posisyon sini ang 13 ka small heat sealed transparent plastic sachets sang shabu.
Samtang kasunod sini ginpatigayon man ang search implementation sa panimalay ni TANDEN ALIAS SAMIR, yara sa legal nga edad, may asawa kag wala sang trabaho kag sa isa ka BAINA TANDEN Y ABDULLA, yara sa legal nga edad, may asawa kag residente sang nasambit nga lugar nga pareho man nga myembro sang Bawan Drug Group kun sa diin nakumpiskar sa posisyon sang mga ini ang 2 ka brown and black leather pouch nga may 14 small heat sealed transparent plastic sachet sang shabu.
Dugang pa nga isa man ka search operation ang ginpatigayon sa kasubong nga lokasyon batuk kay ALIAS KADIL PAGADATAN kag ALIAS BAKWIT, nga nakalagyo naman sa operasyon makaligad matiktikan ang ginpatigayon nga operasyon apang narekober naman ang 18 ka small heat sealed transparent sachets sang shabu sa puluy-an sini.
Nahibaluan nga ang Bawan Drug Group ang isa ka organized big time drug group nga naga operate sa Pikit kag Kabacan, North Cotabato kag sa Maguindanao.
Sa subong natalana nga pasakaan sang kaso nga paglapas sa Section 11 (Possession of Dangerous Drugs) sang Article II sang RA 9165 o Comprehensive Dangerous Drugs Act of 2002 ang mga nadakpan nga suspek.
