KORONADAL CITY- “It’s better to give than to receive” ini ang ginkabuhi sang station manager sang Bombo Radyo Koronadal nga si Bombo Herminio “Hermie Boy” Legaspi makaligad ang madinalag-on nga Dugong Bombo 2017 nga ginpatigayon sa Gaisano Grand Mall Koronadal kahapon, Nobyembre 18, 2017.
Suno kay Bombo Hermie, kada tuig ini nga nagadonar sang iya nga dugo kadungan sang simultaneous blood letting project sang Bombo Radyo Philippines kag Star FM kaupod ang Philippine Red Cross.
Dugang pa sini nga indi kumpleto ang tuig nga indi ini makadonar sang dugo nga isa ka pamaagi agod nga makasalbar sang kabuhi sang mga nagakinanglan.
Bilang station manager sang Bombo Radyo Koronadal, luyag sini nga magsilbi nga halimbawa sa mga kaupdanan sa ubra agod nga maganyat man ang mga ini nga indi magdiha-duha nga magbulig sa isig ka tawo.
Kun sa diin, indi lamang siya ang nangin successful blood donor apang mangin ang pila pa ka myembro sang Bombo Radyo Koronadal nga sanday Bombo Mario Neyra, Bombo Ian Lozare, Bombo John Dagooc, Bombo Nath Guanzon, Bombo Macky Marabulas kag Bombo Jobert Gonzales.
Tuman naman ang pagpasalamat ni Bombo Hermie sa tanan nga Doktor, Nurses, Volunteers, Sponsors, Stakeholders kag Donors sa madinalag-on nga blood letting activity sang Bombo Radyo kun sa diin kabug-usan nga 240 successful blood donors ang nakakontribwer sang 108,0000 cc nga dugo ukon kasubong sang 108 liters ukon 28.53 galons.
