KORONADAL CITY– Nagpaandam ang militar sa pila ka mga kandidato sa South Cotabato nga ila natumod nga naga-usar sang pwersa sang komunista kag rebelde nga New People’s Army agud makapanghakot sang boto halin sa mga pumuluyo sa pila ka banwa.
Nahibaluan nga apisar wala pa man ginhingadlan ang nasambit nga mga kandidato para sa palaabuton nga Barangay kag SK elections, ginpaidalom na an mga ini sa monitoring system sang militar.
Sa interbyu sang Bombo Radyo Koronadal kay Lt. John Alvin Maunahan, spokesperson sang 27th IB Philippine Army, desperado nga nagpalapit ang mga kandidato sa rebelde nga grupo para sa permit to campaign kag permit to win.
Nahibaluan nga sa tion nga nakabayag na sila sa NPA ang rebelde nga grupo na ang mangin bahala kun sa ano nga pamaagi magadaog ang mga ini sa eleksyon.
Sa tion naman nga makumpirmar ang mga kandidato nga yara sa monitoring sang militar, gilayon ang mga ini nga ireport sa DILG agud indi na makapungko sa posisyon.
