KORONADAL CITY- Indi kinahanglan nga mangin bakunado ang isa ka bata antes malakip sa progressive face to face classes nga ginapatuman na sa karon sang Department of Education.
Ini ang ginpahayag ni Ma. Theresa Hallegado, Information Officer sang DepEd South Cotabato Division sa interbyu sang Bombo Radyo Koronadal.
Suno sa iya, indi “required” ang mga kabataan nga bakunado antes magsulod sa buluthuan apang ginpaklaro niya kag ginaawhag niya man ang mga ginikanan nga indi magduha duha nga ipabakuna ang ila nga mga kabataan batok Covid-19 para naman sa ila nga proteksyon padulong sa mga ekswelahan.
Ginpahayag sini nga isa sa mga rason kung ngaa madamo sa gihapon sang mga ginikanan ang nahadlok nga mabakunahan ang ila nga mga kabataan bangud kay kulang ini sa impormasyon.
Sa sini nga pamaagi ang luyag lamang sang ila nga ahensya ang mangin luwas ang mga kabataan sa ano naman nga mga balatian.
Sa karon, kung bakunado ang mga kabataan mas mangin kampanti ang mga ginikanan nga luwas ang ila nga kabataan batok naman Covid-19.
