KORONADAL CITY – Mas makaluluoy pa subong ang sitwasyon sang mga pumuluyo sa Italy nga ginakabig nga sentro subong sang coronavirus disease pandemic.
Sa ekslusibo nga interbyu sang Bombo Radyo Koronadal kay Eleonora Vergara, isa ka Pinay nga residente sa Milan, Italy, ginpakigbahin sini nga desperado na ang mga tawo nga makakaon tubtob nagalab-ot sa punto nga nagaguwa sila agud mag-obra bisan posible nila ini nga ikapatay.
Ginlaragway ni Vergara nga kasubong nga isa ka “suicide mission” ang pagpangita sang obra, makapangita lamang sang makaon ang mga tawo.
Ginpakigbahin sini nga ginahimo ini sang mga pumuluyo bangud wala pa ginahatag sang Italian government ang mga ayuda sa ila.
Samtang ginpakigbahin man sini nga tatlo ka OFWs man ang napatay sa nasambit nga pungsod.
Isa suno pa diri isa ka 60 anyos nga factory worker nga tumandok sang Cebu City kun sa diin gin-atake sa kurason kag natukiban nga positibo ini sa coronavirus kag gilayon nga gin-cremate ang iya bangkay.
