KORONADAL CITY – Positibo ang reaksiyon sang mga Indigenous People’s sa probinsiya sang South Cotabato sa gindihon nga bag-o nga ahensiya agud nga magtutok sa mga ini.
Ini makaligad nga ginkumpirmar ni Presidential Adviser on the Peace Process Sec. Jess Dureza ang pagdihon ni Pangulong Rodrigo Duterte sang panibag-o nga talatapan nga magabulig sa pagduso sa tawhanong kinamatarong, panginahanglanon kag problema sang mga katutubo sa bug-os nga pungsod.
Ang nasambit nga kumpirmasyon ang ginhimo ni Dureza kadungan sa pagtambong sini bilang keynote speaker sang Seslong Festival sa banwa sang T’Boli, South Cotabato.
Suno kay Dureza, gin-aprobahan ni Pangulong Duterte ang iya nga rekomendasyon kadungan sang cabinet meeting sa Malacanang sang Lunes.
Pangapamunuan ni Usec. Allen Capuyan ang talatapan nga pagatawgan “IP table” sa idalom sang Department of Interior and Local Government (DILG).
Indi ini kasubong sang National Commission on Indigenous People (NCIP) nga nagatutok lamang sa ancestral land sang mga IPs, ang “IP table”.
Nahibaluan nga kalakip sa trabaho sang “IP table” amo nga hibaluon ang pulso sang IPs angot sa ginaduso nga Bangsamoro Basic Law (BBL).
Samtang, ginhatagan naman sang pagkilala sang tribo nga Tboli si Dureza bilang adopted son.
