KORONADAL CITY – Nagdangat sa Bombo Radyo Koronadal ang isa ka concerned citizen agud ipalab-ot ang iya reklamo kaangot sa pag-usar suno pa sang mga inmates sang mga cellphone kag gadgets sa sulod sang South Cotabato Provincial Detention and Rehabilitation Center.
Sa interbyu sang Bombo Radyo Koronadal kay alyas Grace, nagakabalaka ini nga posible nga usaron sa ilegal kag malain nga mga plano ang pag-online sang mga persons deprived of liberty (PDL) sa ila mga kaupdanan.
Dugang ni alyas Grace, isa ini ka mabakod nga ebidensiya nga mahimo suno pa nga ipatigayon ang mga plano sini labi na nga kadam-an suno pa sa mga inmates ang may kaso nga pagbayolar sa ilegal nga droga kag murder.
Nagakabalaka man ini para sa kaluwasan sang iya bata nga menor de edad labi na nga gin-upod sadto sang iya himata nga may kaso nga illegal drugs kag murder sa bahin sang Tacurong City kag naghulat suno pa sila sang tatlo ka oras.
Kaangot sini, ginpaathag naman ni South Cotabato Provincial Jail Warden Felicito Gumapac nga hugot nga ginadumilian ang pag-usar sang cellphone magluwas na lamang kun emergency ang sitwasyon.
Pamatood suno pa diri ang mga raid nga ila ginapatigayon sa kada selda kun sa diin ginakumpiska ang mga ini halin sa mga preso.
Ginpasiguro man sini ang kaluwasan sang mga pumuluyo kag pahugtan ang mga raid agud malikawan ang nasambit nga sitwasyon.
