KORONADAL CITY – Nagapadayon sa karon ang imbestigasyon sang kapulisan sa nagluntad nga pagpangluthang sa mga guwardiya sang mining company sa banwa sang Tampakan, South Cotabato nga nagresulta sa pagkapatay sang isa kag pagkapilas naman sang isa pa.
Ini ang kinumpirma ni PMaj. Ramil Aruelo, hepe sang Tampakan MPS sa interbyu sang Bombo Radyo Koronadal.
Ginkilala ang napatay nga si Rolando Salinangan, 56 anyos samtang pilason naman ang kaupod sini nga si Rail Sagal, yara sa legal nga edad kag lunsay residente man sang nasambit nga lugar.
Suno kay Aruelo, samtang nagakaon ang mga biktima sa isa ka birthday party sa Sitio Campo 4, Brgy Danlag sa nasambit nga banwa sang nakabati sila sang asod-asod nga lupok kag nakibot na lamang nga duguon na sanday Salinangan at Sagal.
Gindala pa sa hospital ang mga biktima apang wala na mabulong pa si Salinangan bangud sa iyo sa iya nga liog.
Sa subong blangko pa ang mga otoridad sa motibo sang krimen kag indi pa matumod ang suspek nga nag-usar sang 12 gauge shot gun sa pagtiro sa mga biktima.
