Luwas kag naga-operate ang mga Filipino schools sa Middle East sa pihak sang nagapadayon nga tensyon sa rehiyon suno sa Commission on Filipinos Overseas (CFO).
Suno kay CFO Secretary Dante “Klink” Ang II, padayon ang koordinasyon sang ahensya sa mga administrador sang Philippine Schools Overseas (PSOs) agud masiguro ang kaluwasan sang mga estudyante kag manunudlo.
Wala naman sang may ginreport nga nasamaran ukon nahalitan bangud sang engkwentro.
May mga eskwelahan nga temporaryo nga nagpatigayon sang online classes bilang paghalong kag bilang pagsunod sa mga advisories sang local government, apang padayon nga nagatuon ang mga estudyante.
Sa karon, may yara sang 35 ka Philippine Schools Overseas sa nagkalain-lain nga pungsod, lakip ang 27 sa rehiyon sang Arabian Gulf.
Ini nga mga eskwelahan nagabaton sang ginabanta 25,000 ka mga estudyante kag 1,000 ka mga manunudlo kag mga personnel.
Ginpahayag sang CFO nga padayon nila nga bantayan ang sitwasyon agud masiguro ang kaluwasan sang mga estudyante kag manunudlo nga Pilipino sa luwas sang pungsod.
