KORONADAL CITY – Sugilanon sa subong ang ginhimo nga pagbulig sang mga babaye nga katapo sang Bureau of Fire Protection (BFP) Koronadal sa isa ka Iloy nga ginlauman nga magbunag sa sulod sang kaselyas.
Sandig sa report, nangayo sang bulig sa Emergency Line sang BFP-Koronadal ang isa ka 21 anyos nga Iloy matapos nga indi na masarangan nga magpaospital agod didto na magbun-ag.
Matapos suno pa nga makabaton sang tawag ang nasambit nga talatapan, gilayon nga nagresponder sanday Senior Insp. Jennylyn Te-elan, hepe sang BFP-Koronadal kag mga kaupdanan sini nga sanday FO1 Bon Lerie Magana, FO1 Ressa Mia Tactaquin kag FO1 Kristine Lozada sa Barangay Concepcion kag didto naabtan ang nasambit nga Iloy.
Sa bulig sang babaye nga bombero, normal nga nabunag sang 21 anyos nga iloy ang isa ka Healthy Baby girl kun sa diin, sa inisyal nga pagskeyer wala sang ano man nga komplikasyon ang lapsag.
Ang mga babaye nga bombero na ang nagbulig agod nga mautod ang umbilical cord sini kag mapaguwa sang mga Iloy ang iya nga Placenta.
Agod sa gilayon nga masiguro ang kaluwasan sang mag-iloy gindangat ang mga ini sa South Cotabato Provincial Hospital.
Nakaangkon naman sang pagdayaw ang mga babaye nga Bombero sang BFP Koronadal sa ginhimo nga pagbulig sa nasambit nga Iloy.
