KORONADAL CITY – Wala sa gihapon nakabalik sa ila nga puluy-an ang pila ka mga indibidwal sa mga barangay sa probinsiya sang Sultan Kudarat bangud sa malapnagun nga tubig baha sa nagapadayon nga pagbubo sang ulan.
Sa interbyu sang Bombo Radyo Koronadal kay MDRRMO Sherwin De Guzman, yara sa 25 ka mga pamilya pa halin sa Barangay Tinumegez , Lambayong, Sultan Kudarat ang nagapabilin sa evacuation center bangud lubog sa gihapon sa tubig baha kag lutak ang ila nga puluy-an humalin sang naga awas na ang tubig sa Ala river.
Suno kay De Guzman, nagalab-ot na sa 1,800 ka mga pamilya halin sa lima ka barangay sa ila nga banwa ang nangin apektado sang tibig baha.
Ang nasambit nga mga barangay ang Brgy. Madanding, Udtong, Sadsalan, Sigayan kag Tinumegez.
Ang nasambit nga mga barangay ang yara sa kilid sang Ala river kag bangud sa pag-release sang tubig sa mga dam kag pagkaguba sang dike gani nadoble ang pagbubu sang tubig sa ila nga mga barangay.
Sa subong nagapadayon ang monitoring sang mga opisyal sa tubig sa Ala river agod masiguro ang kaluwasan sa mga residente kag ma-assess sa gihapon ang mga ini nga makapanumbalik nga luwas sa ila nga puluy-an.
Samtang nagapadayon sa subong ang damage assessment sa mga naguba nga ginbilin sa nasambit nga tubig baha.
