Ano bala ang mga dapat nga i-konsiderar kun magpakasal ang isa ka magkahagugma?
Ang kalawigon bala sang isa ka relasyon, ang palanggaanay sa isa kag isa ukon ang kahandaan sa pagsugod sang pamilya ilabi na sa pinansiyal nga aspeto?
Naguwa sa ginpatigayon nga survey sang National Institute of Population and Social Security Research sa Japan sadtong 2015 nga kapin 29.1% nga kalalakinhan nga single nga naga-edad 25 tubtob 34 anyos, kag 17.8% naman sang mga single nga babaye ang nagpahayag nga indi pa nila masarangan magpakasal bangud wala sang budget.
Bangud diri, napabilin ang manubo nga birth rate sa Japan.
Agud masolusyunan ang manubo nga birth rate, may gindihon nga programa ang gobyerno sang Japan nga nagahatag sang bulig-pinansiyal sa mga bag-o kasal.
Ang ini nga bulig-pinansiyal ang nagabalor sang tubtob 600, 000 yen ukon masobra P270, 000, depende sa gintingob nga income sang mag-asawa.
Ang mga mag-asawa nga nagpakasal na sa edad nga 40 anyos panubo (sa mismo registered date sang ila nga pagpakasal) kag may yara sang combined income nga kapin 5.4 million yen ukon 4.8 million ang mahimo makabaton sang kapin 300, 000 yen tubtob 600, 000 yen, depende sa ila kondisyon.
Sa karon, kapin sa 281 ka mga municipalities pa lamang ukon 15% sang tanan nga towns, villages, kag cities sa Japan ang nagapatuman sang nasambit nga programa humalin sang Hulyo.
