KORONADAL CITY- Natalana nga makigkita kay Pres. Rodrigo Duterte sa palaabuton nga Hulyo 11, 2018 ang mga opisyal sang League of the Municipalities of the Philippines agud nga ipalab-ot kay Pres. Duterte ang makaalarma nga pagpatay sa mga alkalde kag pila ka mga opisyal sa pungsod.
Sa ekslusibo nga interbyu sang Bombo Radyo Koronadal kay LMP South Cotabato chapter President kag Tupi, South Cotabato Mayor Reynaldo Tamayo Jr. hugot nila nga ginakondinar ang pagpatay kanday Tanauan, Batangas Mayor Antonio Halili kag General Tinio Nueva Ecija Mayor Ferdinand Bote.
Suno naman kay Mayor Tamayo posible nga bunga sang mga indi beripikado nga mga alegasyon ang pagpatay sa mga opisyal rason nga gin-awhag sini ang mga kasubong nga mga alkalde nga mangin alerto bangud ginasakyan suno pa sang mga kalaban sa pulitika ang mga panghitabo.
Samtang kasunod sang mga pagpangluthang sa mga alkalde, ginaduso sa mga opisyal ang pagsuksok sang bullet proof vest ukon bullet proof protection gear agud mapasiguro ang ila kaluwasan.
