KORONADAL CITY – Napunggan sang mga otoridad sa Tacloban City ang yara sa P1.6 million pesos nga kantidad sang assorted frozen pork meat products halin sa Bulacan nga plano ideliver sa Koronadal City kag iban pa nga syudad sa Mindanao.
Ini ang kasunod naman sang ginpatuman nga total ban sang pork-related products sa pila ka bahin sang Mindanao nga halin sa Luzon bangud man sa African Swine Fever Scare.
Nahibaluan nga ang delivery van sang Marby Food Ventures nga may karga nga 700 crates sang frozen meat products ang nabalabagan sa Veterinary Quarantine Checkpoint sa San Juanico Bridge sa Tacloban City.
Kaangot sini, ginpahayag ni Tacloban City Veterinarian Dr. Eunice Alcantara, nakumpiskar ang nasambit nga mga meat products bangud kulang ang mga ginpakita nga dokumento.
Lunsay resibo lang sang produkto halin sa Bulacan ang ginpakita kag ini ang ginakonsiderar nga “ground zero” sang ASF rason nga gilayon nila ini nga ginkumpiskar.
Nakasulat sa mga resibo nga pagadal-an sang mga meat products nga ginalakipan sang Koronadal, Tacloban, Ormoc, Digos City, Iligan City, San Francisco City, Butuan kag Surigao.
Ang mga nakumpiskar nga mga produkto ang ginlubong na sa Tacloban City Sanitary Landfill sa Barangay San Roque, sa Tacloban.
Kun madumduman, una na nga ginpamatud-an sang Koronadal City Veterinary Office nga nagapabilin nga ASF free ang syudad pinaagi sa dululungan nga pagkaon sang pork barbecue bilang kahabin sang “Pigdiriwang” Lechon Festival sang nakaligad nga 19th Charter Anniversary Celebration.
