MDRRM Officers sa South Cotabato, nagpanguna sa pagdihon sang programa angot sa pagtanyag sang bulig sa mga nilibo ka mga nabiktima sang pagbaha sa Luzon.

KORONADAL CITY – Ginpakigbahin ni Leonard Ballon, ang MDRRM Officer sa banwa sang Surallah kaupod ang tanan nga nga MDRRM officer sa nagkalain lain nga banwa sang probinsya sang South Cotabato nga nagapatigayon sila sang pagpang-awhag sa mga pumuluyo nga makigbahin sa sarang nga mabulig sa mga apektado nga mga residente sa Luzon bangud sa pagpanalasa sang bagyo nga Ulysses.
Suno kay Ballon, ini ang tikang nga ila ginhimo agud nga magahaatg man sang suporta sa mga nangin apektado apisar sa dyutay lang nga pamaagi.
Ang mga malikom nga mga donasyon ang ila nga igapalab-ot sa Office of the Civil Defense 12 agud nga ipalab-ot sa mga lugar nga apektdo sang kalamidad.
Dugang pa nga naka standby man ang ila nga mga personnel sa tion nga may yara sang mga augmentation nga igapatigayon agud nga makabulig sa mga nagkalain lain nga operasyon nga igapatigayon sa mga lugar nga nangin apektado sang kalamidad.
Sa subong padayon ang ila nga panawagan sa tanan nga magbuylog sa pagbulig ilabi na sa mga nagapanguna nga panginahanglan sang mga biktima sang natural nga kalamidad.