KORONADAL CITY – Kinahanglan nga ipatuman anay sang mga Provincial Election officers sang mga Local Government Units (LGUs) ang maximum tolerance angot sa issue sang property rights batok sa COMELEC Resolution 10730 ukon fair election act bangud natalana pa ini nga paga-reviewhon sang COMELEC “en banc”.
Ini ang nangin pahayag ni Ret.COMELEC Commissioner Rowena Guanzon sa eksklusibo nga interview sang Bombo Radyo Koronadal.
Suno kay Guanzon, dapat lamang ini nga himuon para sa mas maathag nga bersyon bangud sa issue nga nagalapas ini sa kinamatarong sang isa ka indibidwal nga handum lamang mapabutyag ang iya nga “advocacy” ukon pagsuporta man sa isa ka kandidato.
Dugang pa sini, mainit ini nga ginadiskusyonan ang ginahimo sang Task Force Baklas sa tunga sang campaign season sang mga national candidates bangud indi maathag ang tanan nga probisyon sang sini nga Comelec resolution.
Gin-athag pa sini nga gindula naman gani ang “3-day notice” sa mga private property owners sa ila nga mga campaign materials nga nakakabit sa ila nga propiedad.
Mas makapaayo pa nga ipatuman anay ang mga polisa sa pagkuha sang mga campaign materials nga yara sa guwa sang designated posting areas parehas sang mga nakakabit sa mga puno sang kahoy kag sa mga pampubliko nga lugar sa baylo nga ipamilit suno pa ang pagkakas sa mga pribado nga lugar kasubong sang panimalay kag mga establisyemento.
Ginlaygayan man ni Guanzon ang mga kapulisan nga indi na pagsudlon ang mga panimalay agud mangin luwas sa kaso nga administratibo kag iban pa.
Samtang, sa mga indibidwal nga mabiktima sini, ginasuhestiyon ni Guanzon nga magkuha sang ebedensiya batuk sa mga magpamilit nga katapu sang Taskforce Baklas.
