KORONADAL CITY- Kumpirmado nga napatay sa engkwentro sa Brgy. Ned Lake Sebu, South Cotabato ang notoryus nga lider sang platoon My Phone sang Guerilla Front 73 sang New People’s Army.
Sa ekslusibo nga interbyu sang Bombo Radyo Koronadal kay 33rd Infantry Battalion Lt. Col. Harold Cabunoc kalakip sa mga narekober nga bangkay sa engkwentro ang bangkay ni Ka George nga isa ka mataas nga lider sang NPA nga nagaoperar sa Daguma Mountain Range.
Natukiban man nga ang nasambit nga lider sang NPA, residente sang Koronadal City kag ang matuod nga pangalan amo suno pa si Randy Lumigo nga nakapangasawa sang taga-Columbio, Sultan Kudarat tubtob nga nagsulod sa grupo sang NPA kag nainvolbar sa pagpangatake sa mga otoridad, extortion activities kag arson.
Samtang, kaangot sini, nagtuga naman sang palamangkutanon ang identity sang nasambit nga lider sang NPA bangud ginpahayag sa Bombo Radyo Koronadal sang pamilya Lumigo gikan sa Brgy. Morales Koronadal City nga madugay na nga patay si Randy Lumigo nga ila nga himata bangud sa sakit.
Apang, nanindugan ang militar nga ang napatay nga lider ang nagikan sa nasambit nga lugar kun diin sa subong nagapatigayon ang mga ini sang imbestigasyon.
