KORONADAL CITY- Pormal na nga nagsungka sa militar si Communist Party of the Philippines-National Democratic Front (CPP-NDF) Far South Mindanao Region Spokesperson “Ka Efren” kaupod ang asawa sini nga medic.
Ini ang ginkumpirmar sa Bombo Radyo Koronadal ni 27th IB, Commanding Officer Lt. Col. Benjamin Leander.
Suno kay Ka Efren, nakit-an niya ang pagpangabudlay sang mga NPA apang kasubong nga wala sang klaro ang solusyon sa ila ginapakigbato.
Magluwas sini, nakapoy naman suno pa ini sa 26 ka tuig nga pagka rebelde bangud indi sini makaupod ang iya pamilya sa malawig nga panahon.
Kaangot sini, nagpahayag man suno pa sang kahandaan si Ka Efren nga atubangon ang patong patong nga kaso batuk sa iya ilabi na nga madamo na ini sang pending case.
Sa subong nagapabilin ini sa kostudiya sang 27th IB kun sa diin prayoridad suno pa sang militar bilang isa ini nga NPA surrenderee nga ipaidalum sa programa sang gobyerno agud makabaton sang benepisyo.
Nagpasalamat naman si Col. Leander kay South Cotabato Gov. Daisy Avance-Fuentes bangud ini ang nagin dalan agud magsungka sa militar ang mataas nga lider sang NPA.
