KORONADAL CITY – Ginpasiguro sang komunista kag rebelde nga New People’s Army nga magapatigayon sila sang massive retaliation makaligad tawgon nga terorista nga organisasyon ni Pres. Rodrigo Duterte ang CPP-NPA-NDFP.
Sa ginpagwa nga statement sang National Democratice Front Far South Mindanao Region nga pirmado ni Ka Efren Aksasato tagpamaba sang, NDF-FSMR nagpahayag ang mga ini sang pagkadismaya sa Duterte administration kun sa diin nagpalutos suno pa ang administrasyon sa imperyalismo sang Estados Unidos kag ginpabay-an ang pag guba sang GPH-NDFP peace negotiations.
Gin-akusaran pa sang NPA nga ginapabay-an sang Duterte administration ang Armed Forces of the Philippines kag mga dalagkuan nga kumbuyuhan sa Sultan Kudarat kag South Cotabato nga abusuhon ang mga pumuluyo pinaagi sa pag-agaw sa mga kadutaan sang mga lumad kag pagpatigayon sang extrajudicial killings.
Samtang sa interbyu sang Bombo Radyo Koronadal kay 33rd IB commanding officer Lt. Col Harold Cabunoc, preparado ang militar sa anuman nga pamahog sang NPA kag ginpasiguro nga indi magapalutos ilabi na nga nahibaluan sang mga pumuluyo ang tuman nga pagpabudlay nga ginahimo sang NPA nga indi luyag sang pag-umwad.
Sa subong nakabatak na ang alerto sa bug-os nga probinsya sang Sultan Kudarat mangin man sa South Cotabato.
Dugang pa ni Col Cabunoc nga may tion pa agud magsungka ang NPA bag-o pa maulihi ang tanan.
