KORONADAL CITY – Nagapangatubang sa kaso nga pagbayolar sa Bayanihan to Heal as One Act kag Price Act ang duha ka tawo makaligad nadakpan nga nagabaligya sang alcohol sa overpriced nga presyo.
Sa interbyu sang Bombo Radyo Koronadal kay CIDG-South Cotabato provincial officer Police Major Rogelio Pineda Jr., gindakop nila si Datu Pandal Nanding Sabal sang President Quirino, Sultan Kudarat makaligad ginabaligya sini ang kinarton nga mga alcohol sa balor nga P93, mas mahal kumpara sa SRP sini nga P50.
Madumdoman nga nagpatigayon man sila sang kasubong nga operasyon sa siyudad sang Koronadal kun sa diin nakumpiskar naman ang 50 ka galon sang alcohol nga nagabalor sang P850 kada isa sa baylo nga P650 base sa SRP sini.
Suno kay Major Pineda, yara sa masobra tunga sa milyon ukon kabug-osan nga P513,000 ang balor sang ila nakumpiskar nga mga alcohol, sanitizers kag iban pa sa ila 15 ka mga operasyon kag natalana nga i-turnover ang mga ini sa Department of Health agud ila nga usaron.
Base sa ila inventory sa bug-os nga rehiyon, nakakumpiskar sila sang 1,045 ka litro sang alcohol, 287 face mask, 207 ka sanitizers, kag ginabulobanta nga 17,000 surgical gloves.
Padayon man ang pagpaandam sang opisyal nga indi magpamintaha ilabi na nga yara kita subong sa krisis tuga sang covid-19.
