KORONADAL CITY – Naglab-ot sa masobra P600,000 nga kantidad sang kwarta ang ginkawat sa Sta.Cruz Multi-Purpose Cooperative sa Purok 9A, Barangay Poblacion, Tupi, South Cotabato.
Sandig sa imbestigasyon sang Tupi PNP, alas-7 sang aga sang Enero 11 sang nagpadulong ang Development Officer sang nasambit nga kooperatiba sa police station kag ginpahibalo nga ang ila nga opisina ang ginkawatan sang mga wala makilala nga mga suspek.
Naguwa sa imbestigasyon, nga ginguba sang mga suspek ang doorknob kag padlock sang pwertahan nga nangin point of entry sang mga ini kag ginguba man ang cabinet nga may safety vault agud makuha ang kwarta.
Sa kabug-usan yara sa P638,281 tanan ang cash nga nakuha sang mga kawatan.
Sa subong, nagapadayon ang imbestigasyon sang kapulisan angot diri kag ginareview naman ang mga CCTV footage agud makilala ng mga suspek.
