Indi magnubo sa apat ka milyones ka mga deboto ang nagpartisipar sa Traslacion ukon prusisyon sang imahen ni Hesus Nazareno sini nga tuig, suno sa Manila Public Information Office.
Base sa datos halin sa Innovation Integrated GIS and Data Hub sang Manila Disaster Risk Reduction and Management Office, ang ihap sang mga indibidwal ginsugod bilangon halin alas-3 sang kaagahon sang Biyernes tubtob alas-dose sang kaagahon subong nga Sabado.
Nagsugod ang Traslacion sini nga tuig sa Quirino Grandstand sang alas-4 sang kaagahon sang Biyernes.
Ang Traslacion isa sa mga aktibidad nga ginahimo kada Kapistahan ni Hesus Nazareno.
Ang prusisyon nagapadumdum sang pag-abot sang imahen ni Nuestro Padre Jesus Nazareno (Our Lord Jesus the Nazarene) halin sa Acapulco, Mexico pakadto sa Pilipinas sang 1600s, kag ang pagbalhin sini halin sa Bagumbayan (daan nga Intramuros) pakadto sa Quiapo Church – St. John the Baptist Parish sang 1767.
