KORONADAL CITY – Naglab-ot sa masobra Php3M ang napagkit nga danyos sa pagkasunog sang storage room sang JZ Sisters Trading Corporation sa Gensan Drive, Barangay Zone iii, Koronadal City alas-12:45 kaina sang hapon.
Ini ang ginpahayag ni FO3 Marco Angelo Castillo, chief sang information section sang Bureau of Fire Protection Koronadal sa interview sang Bombo Radyo.
Suno kay Castillo, nagapadayon pa ang imbestigasyon kung ano ang gintunaan sang sunog apang isa sa mga ginalantaw nga rason amo ang faulty wiring.
Nahibaluan nga nagsugod ang kalayo sa second floor sang edifisyo kun diin nabutang ang mga foams, plastic wares, kag mga dura box.
Tatlo ka mga fire trucks ang nagresponde sa sunog kun diin tigayon nga naapula ang kalayo pasado ala-1 na sang hapon.
Samtang, suno kay Claire Lanzona, kahera sang commercial establishment, nakibot man sila sa pagluntad sang sunog.
Ang mga tricycle driver suno pa nga nagaparking sa guwa sang establisyemento amo ang una nakatalupangod sang madamol nga aso kag kalayo sa 2nd floor.
Sang gin-checkyar nila agud nga apulahon ini wala na sila sang may nahimo bangud nagdako gilayon ang kalayo.
Gani, ginreport sang mga ini sa BFP-Koronadal agud maapula kag indi na madalahig ang mga kaingod nga edifisyo.
Kaangot sini, nagpanawagan naman ang BFP-Koronadal sa tanan nga maghalong kag bantayan gid ang mga electrical equipment ilabi na ang overheating agud malikawan man ang sunog.
